Tirumala Teppotsavam 2026: తిరుమల శ్రీవారి సాలకట్ల తెప్పోత్సవాలు 2026 – తేదీలు, దర్శన సమయాలు, సేవల రద్దు

 

ప్రపంచ ప్రసిద్ధి చెందిన తిరుమల శ్రీ వేంకటేశ్వరస్వామివారి ఆలయంలో ప్రతి సంవత్సరం ఘనంగా నిర్వహించే సాలకట్ల తెప్పోత్సవాలు ఈ ఏడాది ఫిబ్రవరి 26 నుండి మార్చి 02వ తేదీ వరకు వైభవంగా జరగనున్నాయి.

ఈ ఉత్సవాల సందర్భంగా ప్రతిరోజూ రాత్రి 7.00 గంటల నుంచి 8.00 గంటల వరకు స్వామివారు, అమ్మవారు శ్రీవారి పుష్కరిణిలో తెప్పలపై విహరిస్తూ భక్తులకు దివ్య దర్శనం ఇస్తారు.

2026 తెప్పోత్సవాల రోజువారీ విశేషాలు

మొదటి రోజు – ఫిబ్రవరి 26

తెప్పోత్సవాల తొలి రోజున శ్రీ సీతా లక్ష్మణ ఆంజనేయ సమేతంగా శ్రీరామచంద్రమూర్తి తెప్పలపై విహరిస్తారు. స్వామివారు పుష్కరిణిలో మూడు చుట్లు తిరుగుతూ భక్తులకు అపూర్వ దర్శనం కలిగిస్తారు.

రెండో రోజు – ఫిబ్రవరి 27

ఈ రోజున రుక్మిణీ సమేతంగా శ్రీకృష్ణస్వామి తెప్పలపై మూడు సార్లు పుష్కరిణిలో విహరించి భక్తులను ఆనందింపజేస్తారు.

మూడో రోజు – ఫిబ్రవరి 28

శ్రీభూ సమేతంగా శ్రీ మలయప్పస్వామివారు తెప్పలపై మూడుసార్లు పుష్కరిణిని చుట్టి భక్తులను అనుగ్రహిస్తారు.

నాలుగో రోజు – మార్చి 01

నాలుగో రోజు శ్రీ మలయప్పస్వామివారు ఐదు సార్లు తెప్పపై విహరిస్తూ భక్తులకు దివ్య దర్శనాన్ని ప్రసాదిస్తారు.

ఐదో రోజు – మార్చి 02

తెప్పోత్సవాల చివరి రోజున శ్రీ మలయప్పస్వామివారు ఏడు సార్లు పుష్కరిణిలో తెప్పపై విహరిస్తూ భక్తులను కటాక్షిస్తారు. ఇది తెప్పోత్సవాల్లో అత్యంత వైభవంగా జరిగే రోజు కావడం విశేషం.

ఆర్జిత సేవలు రద్దు

తెప్పోత్సవాల నిర్వహణ నేపథ్యంలో కొన్ని ఆర్జిత సేవలను టీటీడీ రద్దు చేసింది.

• ఫిబ్రవరి 26, 27 తేదీల్లో:

సహస్రదీపాలంకార సేవ రద్దు

• ఫిబ్రవరి 28, మార్చి 01, 02 తేదీల్లో:

ఆర్జిత బ్రహ్మోత్సవం, సహస్రదీపాలంకార సేవలు రద్దు