Ishta Kameswari Temple: శ్రీ ఇష్టకామేశ్వరి దేవి ఆలయం - శ్రీశైలం

దట్టమైన నల్లమల అడవుల నడుమ దాగి ఉన్న ఒక మహిమాన్విత శక్తి క్షేత్రం ఇష్ట కామేశ్వరి దేవి ఆలయం.
ఈ ఆలయం గురించి అతి కొద్దిమందికే తెలుసు.
శ్రీశైల క్షేత్రంలో తప్ప దేశంలో మరెక్కడా ఇష్ట కామేశ్వరి దేవి పేరుతో ఆలయం కనిపించదు అనడం ఈ క్షేత్ర ప్రత్యేకత.

దర్శనం – అదృష్టానికి ప్రతీక

ఇష్ట కామేశ్వరి అమ్మవారి దర్శనం అందరికీ లభించదని భక్తుల గాఢ నమ్మకం.

ఎంతో అదృష్టం ఉంటే తప్ప అమ్మవారి దర్శన భాగ్యం కలగదని భక్తులు విశ్వసిస్తారు.

అందుకే అతి కొద్దిమంది మాత్రమే ఈ అడవి మార్గాన్ని అధిగమించి అమ్మవారి దర్శనానికి వెళ్తుంటారు.

మనస్ఫూర్తిగా కోరుకుంటే ఏ కోరిక అయినా నెరవేరుతుందన్న అపార విశ్వాసం భక్తుల్లో ఉంది.

అమ్మవారి అనుగ్రహ విధానం

అమ్మవారిని దర్శించిన తరువాత మన మనసులోని కోరికను ఆమెకు చెప్పిఅమ్మవారి నుదుటన మన చేతితో బొట్టు పెట్టాలి.

ఆ క్షణంలో అమ్మవారి నుదురు నిజమైన మనిషి నుదురులాగా మెత్తగా తగలడం, అనిర్వచనీయమైన అనుభూతితో ఒళ్ళంతా జలదరించడం అనేది అనేక భక్తుల అనుభవం.

గుహలో వెలసిన తపోమూర్తి

ఇష్ట కామేశ్వరి అమ్మవారు

చతుర్భుజాలతో దర్శనమిస్తారు.

• రెండు చేతుల్లో తామర మొగ్గలు,

• మరో రెండు చేతుల్లో శివలింగం, రుద్రాక్ష మాల ధరించి

• తపస్సు చేస్తున్నట్లుగా దర్శనమిస్తారు.

ఒక గుహలో వెలసిన ఈ ఆలయంలో, దీపపు వెలుగు మధ్య అమ్మవారిని దర్శించుకోవాలి. ఆ ప్రశాంత వాతావరణం భక్తులకు ఆధ్యాత్మిక భావనను కలిగిస్తుంది.

ఆలయ పరిసరాల్లో కొద్దిసేపు కూర్చుని ధ్యానం చేస్తే మనసుకు అపూర్వమైన ప్రశాంతత లభిస్తుంది.

చెంచుల నిత్య పూజలు

ఈ నల్లమల అడవుల్లో నివసించే చెంచు గిరిజనులు, ఇష్ట కామేశ్వరి అమ్మవారికి నిత్యం పూజలు నిర్వహిస్తుంటారు. వారి భక్తి, సరళత ఈ క్షేత్రానికి మరింత పవిత్రతను చేకూరుస్తుంది.

ప్రయాణం – ఒక సాహసం

ఒకప్పుడు ఈ ఆలయానికి చేరుకోవడానికి సరైన దారి కూడా లేకపోయేది. కొండల మీద జీపు ప్రయాణం అత్యంత ప్రమాదకరమైన సాహసంగా ఉండేది. అందుకే అప్పట్లో అడవుల్లోని సిద్ధులచే మాత్రమే అమ్మవారు పూజలందుకునేది.

ఇప్పుడు కొంతమేర రవాణా సౌకర్యాలు మెరుగుపడటంతో సామాన్య భక్తులు కూడా

అమ్మవారి దర్శనానికి వెళ్లగలుగుతున్నారు.

ఆలయ స్థానం

శ్రీశైలం కూడలి నుంచి సుమారు 20 కిలోమీటర్ల దూరంలో, దట్టమైన నల్లమల అడవుల మధ్య

ఇష్ట కామేశ్వరి దేవి ఆలయం ఉంది.

ఇక్కడికి

• కార్లు వెళ్లలేవు,

• శ్రీశైలం నుంచి పరిమిత సంఖ్యలో జీపులు మాత్రమే నడుస్తాయి.

ఈ ప్రయాణం భక్తికి పరీక్షలా అనిపించినా,  చివరికి లభించే అమ్మవారి దర్శనం

జీవితాంతం గుర్తుండిపోయే అనుభూతిగా మిగులుతుంది.