Hatakeswaram Temple Significance: హటకేశ్వరం క్షేత్రం – శ్రీశైలం సమీపంలోని పవిత్ర స్థల పురాణం, చరిత్ర, ఆలయ విశేషాలు

 

హటకేశ్వరం ఎక్కడ ఉంది?

పరమశివుడు స్వయంభువుగా పగిలిన కుండ పెంకులో వెలసిన పవిత్ర క్షేత్రమే హటకేశ్వరం. ఈ క్షేత్రంలో శివుడు అటికేశ్వరుడిగా పూజలందుకుంటున్నాడు.

హటకేశ్వరం ఆంధ్రప్రదేశ్ రాష్ట్రం, నంద్యాల జిల్లా, శ్రీశైలం మండలానికి చెందిన గ్రామం. ద్వాదశ జ్యోతిర్లింగాలలో ఒకటైన శ్రీశైలానికి సుమారు 3 కిలోమీటర్ల దూరంలో ఉన్న ఈ గ్రామం ప్రసిద్ధ పుణ్యక్షేత్రంగా విరాజిల్లుతోంది.

నడిచే దైవంగా ఖ్యాతి పొందిన శ్రీ ఆది శంకరాచార్యులు ఈ పరిసరాలలోనే నివసించి తపస్సు చేసినట్లు ఆలయ స్థల పురాణం ద్వారా తెలుస్తోంది.

హటకేశ్వరం పేరు వెనుక చరిత్ర

పరమశివుడు **‘అటిక’ (ఉట్టికి ఉపయోగించే మట్టి కుండ పెంకు)**లో వెలిసిన కారణంగా ఈ ఆలయంలోని ఈశ్వరుని మొదట అటికేశ్వరుడు అని పిలిచేవారు. కాలక్రమేణా అది హటకేశ్వర స్వామిగా మారింది.

నిరంతరం హటకేశ్వరుని నామస్మరణతో ఆ ప్రాంతానికి కూడా హటకేశ్వరం అనే పేరు స్థిరపడిపోయింది.

ఈ ప్రాంతంలో చెంచులు తెగకు చెందిన ఆదివాసీలు నివసిస్తున్నారు. దేవాలయ పరిసరాలలో పలు ఆశ్రమాలు, మఠాలు ఉన్నాయి. ముగ్ధమనోహరమైన ప్రకృతి, ప్రశాంతమైన వాతావరణంలో ఆదిశంకరాచార్యులు తపస్సు చేసిన పవిత్ర స్థలమిది.

ఆలయ స్థల పురాణం

హటకేశ్వరం క్షేత్ర స్థల పురాణం మహా శివభక్తుడు కుమ్మరి కేశప్పతో ముడిపడి ఉంది.

శ్రీశైలం సమీప గ్రామంలో నివసించిన కేశప్ప, వంశపారంపర్యంగా వచ్చిన కుమ్మరి వృత్తిని కొనసాగిస్తూ, శ్రీశైల దర్శనానికి వచ్చే భక్తులకు నిస్వార్థంగా అన్నదానం చేసేవాడు.

భక్తుల సేవలో తరించిన కేశప్ప

శివ దర్శనానికి వెళ్లే భక్తులు కేశప్ప ఇంట్లో ఆగి భోజనం చేసి తమ యాత్రను కొనసాగించేవారు. దారి పొడవునా అతని సేవను కొనియాడేవారు. దీంతో కేశప్ప పేరు చుట్టుపక్కల ప్రాంతాల్లో ప్రసిద్ధి చెందింది.

ఇరుగు పొరుగు వారి అసూయ

కేశప్పకు పెరుగుతున్న పేరు, గౌరవాన్ని చూసి అసూయ చెందిన ఇరుగుపొరుగు వారు ఒక అర్ధరాత్రి వేళ అతని కుండలన్నీ పగులగొట్టి, కుండలు తయారు చేసే ‘అటికె’ను కూడా పాడుచేశారు.

కేశప్ప ఆవేదన

తెల్లారగానే జరిగిన నష్టం చూసి కేశప్ప లబోదిబోమన్నాడు. ఆ రోజు మహాశివరాత్రి కావడంతో యాత్రికుల సంఖ్య పెరిగింది.

కేశప్పకు తన జీవనోపాధి పోయిన బాధ కంటే, శివభక్తులకు అన్నప్రసాదం అందించలేకపోతున్నాననే బాధే ఎక్కువగా కలిగింది.

యాత్రికులను కేశప్ప ఇంటికి పంపిన ఇరుగుపొరుగు

ఇదే అవకాశంగా భావించిన ఇరుగుపొరుగు వారు, శ్రీశైలం వెళ్తున్న యాత్రికులను కేశప్ప ఇంటికి పంపారు.

అమ్మడానికి కుండలు లేవు… తయారు చేయడానికి అటికె లేదు…

అతిథులను ఆహ్వానించిన కేశప్ప, భోజన ఏర్పాట్లు ఎలా చేయాలో తెలియక పెరట్లో కూర్చుని కన్నీరు పెట్టుకున్నాడు.

ప్రత్యక్షమైన పరమేశ్వరుడు

తన భక్తుని ఆవేదన చూసి చలించిపోయిన పరమేశ్వరుడు, పగిలిన కుండ పెంకులో ప్రత్యక్షమయ్యాడు.

లోపలికి వెళ్లి భక్తులకు భోజనం వడ్డించమని ఆజ్ఞాపించాడు.

లోపలికి వెళ్లిన కేశప్పకు అక్కడ కుండల నిండా వివిధ రకాల ఆహార పదార్థాలు కనిపించాయి.

ఆ భోజనాన్ని శివ మహా ప్రసాదంగా యాత్రికులకు వడ్డించాడు.

శివుడు అటికెలో ప్రత్యక్షమైన ఈ ప్రదేశమే మొదట అటికేశ్వరం, తరువాత హటకేశ్వరంగా ప్రసిద్ధి చెందింది.

ఆలయ విశేషాలు

• ఇక్కడ శివుడు స్వయంభు లింగ రూపంలో దర్శనమిస్తాడు

• అత్యంత మహిమాన్వితమైన శైవ క్షేత్రం

• రెండు కిలోమీటర్ల దూరంలో శిఖరేశ్వరం

• ఆలయ మార్గంలోనే పాలధార – పంచధార

• ఆదిశంకరాచార్యుల పాదముద్రలు ఉన్న బండ దర్శనం

• దట్టమైన అటవీ ప్రాంతం, ఔషధ గుణాలున్న మూలికలు, తేనె లభ్యం

ప్రాచీనమైన హటకేశ్వర స్వామిని దర్శిస్తే మొండి రోగాలు కూడా నయమవుతాయని భక్తుల విశ్వాసం.

హటకేశ్వరం దర్శనం ఎందుకు చేయాలి?

శ్రీశైలం వెళ్లిన భక్తులు తప్పకుండా హటకేశ్వరం దర్శించుకోవాలి.

అప్పుడే శ్రీశైలం యాత్ర ఫలం సంపూర్ణంగా లభిస్తుందని పెద్దలు అంటారు.