Meliaputti Venu Gopala Swamy Temple: మెళియాపుట్టి వేణుగోపాలస్వామి ఆలయం – 2026 డోలోత్సవాలు, మఘ ప్రత్యేకత, స్థల చరిత్ర

శ్రీకాకుళం జిల్లాలోని పురాతన దేవాలయాల్లో ఒకటైన మెళియాపుట్టి వేణుగోపాలస్వామి ఆలయం డోలోత్సవాలకు ముస్తాబవుతోంది. మార్చి 03 నుంచి ప్రారంభమయ్యే ఈ ఉత్సవాల కోసం ఆలయ అధికారులు ముమ్మరంగా ఏర్పాట్లు చేస్తున్నారు.

ఆంధ్ర–ఒడిశా సరిహద్దులో, మహేంద్రతనయ నది తీరాన వెలసిన ఈ దేవాలయాన్ని పర్లాఖిమిడి రాజవంశస్థులు 1810 సంవత్సరంలో నిర్మించినట్లు చారిత్రక ఆధారాలు తెలియజేస్తున్నాయి. శ్రీకాకుళం జిల్లా కేంద్రానికి సుమారు 70 కిలోమీటర్ల దూరంలో ఉన్న ఈ క్షేత్రం భక్తుల విశ్వాసానికి నిలయంగా నిలుస్తోంది.

తొమ్మిది రోజుల యాత్ర వైభవం

ప్రతి సంవత్సరం హోలీ పర్వదినాన ఈ ఆలయంలో యాత్ర ప్రారంభమవుతుంది. మొత్తం తొమ్మిది రోజుల పాటు ఉత్సవాలు ఘనంగా నిర్వహిస్తారు. జిల్లా నలుమూలల నుంచి భక్తులు తరలివస్తుండగా, ఒడిశా రాష్ట్రంలోని గజపతి జిల్లా నుంచి కూడా పెద్ద ఎత్తున భక్తులు పాల్గొంటారు.

యాత్రకు ముందు ఉత్సవమూర్తులకు మహేంద్రతనయ నదిలో చక్రతీర్థ స్నానం నిర్వహించడం ఆనవాయితీ. అనంతరం స్వామివారిని గ్రామంలో ఊరేగింపుగా తీసుకువచ్చి, ప్రత్యేకంగా అలంకరించిన మండపంలోని ఊయలలో ప్రతిష్ఠిస్తారు. ఈ డోలోత్సవ దృశ్యం భక్తులకు అపూర్వమైన ఆనందాన్ని కలిగిస్తుంది.

‘మఘ’ కార్యక్రమం ప్రత్యేకత

ఈ క్షేత్రంలో జరిగే “మఘ” కార్యక్రమం ఎంతో విశిష్టమైనది. స్వామి సన్నిధిలో ఎత్తైన చెరుకు గడను నిలబెట్టి, దాని చుట్టూ వరి గడ్డి వేసి నిప్పు అంటిస్తారు. చెరుకు కాలిన తర్వాత అది ఏ దిశగా పడుతుందో ఆ దిశలో ఆ సంవత్సరంలో పంటలు బాగా పండుతాయని భక్తుల గాఢ విశ్వాసం. ఈ సంప్రదాయం స్థానిక వ్యవసాయ సంస్కృతికి, దేవాలయ ఆచారాలకు ప్రతీకగా నిలుస్తోంది.