Tirupati Govindaraja Swamy Temple: తిరుపతి శ్రీ గోవిందరాజస్వామి ఆలయం – ఫిబ్రవరి 2026 విశేష ఉత్సవాలు, ఊరేగింపులు

 

తిరుపతి శ్రీ గోవిందరాజస్వామివారి ఆలయంలో ఫిబ్రవరి నెలలో పలు విశేష ఉత్సవాలు భక్తిశ్రద్ధలతో నిర్వహించనున్నట్లు ఆలయ అధికారులు తెలిపారు. వాటి వివరాలు ఇలా ఉన్నాయి.

ఫిబ్రవరి 1

శ్రీ గోవిందరాజస్వామివారి తెప్పోత్సవాలు ముగింపు.

ఫిబ్రవరి 3

ప్రణయ కలహ మహోత్సవం సందర్భంగా సాయంత్రం శ్రీ గోవిందరాజస్వామివారు ఆలయ నాలుగు మాడ వీధుల్లో ఊరేగి భక్తులను అనుగ్రహించనున్నారు.

ఫిబ్రవరి 5

ఉత్తర నక్షత్రం పురస్కరించుకుని సాయంత్రం 6 గంటలకు, ఉభయనాంచారులతో కలిసి శ్రీ గోవిందరాజస్వామివారు ఆలయ నాలుగు మాడ వీధుల్లో విహరించి భక్తులకు దర్శనమిస్తారు.

ఫిబ్రవరి 6, 13, 20, 27

ప్రతి శుక్రవారం సాయంత్రం 6 గంటలకు ఆలయ మాడ వీధుల్లో శ్రీ ఆండాళ్ అమ్మవారు భక్తులకు దర్శనమిస్తారు.

ఫిబ్రవరి 7

అధ్యయనోత్సవాలలో భాగంగా పెద్ద శాత్తుమొర సందర్భంగా సాయంత్రం 5.30 గంటలకు, ఉభయనాంచారులతో కలిసి శ్రీ గోవిందరాజస్వామివారు, శ్రీ నమ్మాళ్వార్‌ ఆలయ నాలుగు మాడ వీధుల్లో విహరించి భక్తులను కటాక్షించనున్నారు.

ఫిబ్రవరి 10

అధ్యయనోత్సవాల ముగింపు సందర్భంగా ఉదయం శ్రీదేవి, భూదేవి సమేత శ్రీ గోవిందరాజస్వామివారు, శ్రీ ఆండాళ్ అమ్మవారు, సేనాధిపతివారు, ఆళ్వార్లు — కపిలతీర్థం వద్దగల ఆళ్వార్ తీర్థానికి ఊరేగింపుగా వెళ్లి శాత్తుమొర, ఆస్థానం నిర్వహిస్తారు. అనంతరం తిరిగి ఆలయానికి చేరుకుంటారు.

ఫిబ్రవరి 12

శ్రీనివాసమంగాపురం శ్రీ కల్యాణ వేంకటేశ్వరస్వామివారి బ్రహ్మోత్సవాలలో భాగంగా గరుడసేవ సందర్భంగా ఉదయం 6.30 గంటలకు శ్రీ గోవిందరాజస్వామివారి ఆలయం నుంచి శ్రీ ఆండాళ్ అమ్మవారి మాలల ఊరేగింపు నిర్వహించబడుతుంది.

ఫిబ్రవరి 16

శ్రవణ నక్షత్రం పురస్కరించుకుని సాయంత్రం 6 గంటలకు శ్రీదేవి, భూదేవి సమేత శ్రీ కల్యాణ వేంకటేశ్వరస్వామివారు ఆలయ నాలుగు మాడ వీధుల్లో విహరించి భక్తులకు దర్శనమిస్తారు.

ఫిబ్రవరి 25

రోహిణి నక్షత్రం సందర్భంగా సాయంత్రం 6 గంటలకు రుక్మిణి, సత్యభామ సమేత శ్రీ పార్థసారధిస్వామివారు మాడ వీధుల్లో ఊరేగి భక్తులను కటాక్షిస్తారు.