Kolletikota Peddintliamma Jatara: కొల్లేటికోట పెద్దింట్లమ్మ జాతర 2026 – చరిత్ర, ఉత్సవాలు, ప్రయాణ సూచనలు

కొల్లేరు సరస్సు నడిమధ్యలో ఉన్న కొల్లేటికోటలోని పెద్దింట్లమ్మ వారి ఆలయం శతాబ్దాల చరిత్రను కలిగిన ప్రముఖ శక్తి క్షేత్రం. ఈ ఆలయంలో అమ్మవారు తొమ్మిది అడుగుల ఎత్తుతో, విశాల నేత్రాలతో, పద్మాసన భంగిమలో భక్తులకు దర్శనమిస్తారు.

ప్రతి సంవత్సరం ఫాల్గుణ శుద్ధ పాడ్యమి నుంచి పౌర్ణమి వరకు పెద్దింట్లమ్మ ఉత్సవాలు ఘనంగా నిర్వహిస్తారు.

ఉత్సవాల్లో భాగంగా ద్వాదశి రోజున, పెద్దింట్లమ్మ సమేతంగా జలదుర్గ గోకర్ణేశ్వర స్వామివారి కళ్యాణం కొల్లేటికోట సమీపంలోని గోకర్ణేశ్వర ఆలయంలో వైభవంగా జరుగుతుంది.

చారిత్రక నేపథ్యం

వేంగీ చాళుక్యుల కాలంలో ఈ ప్రాంతాన్ని సరోనాథులు పరిపాలించారు. అనంతరం ఇది ఓధ్ర గజపతుల పాలనలోకి వెళ్లింది. గజపతి రాజుకు ఇక్కడ ఒక కోట ఉండేది.

ఆ కోటను స్వాధీనం చేసుకోవడానికి మహ్మదీయులు, కొల్లేరు సరస్సు సమీపంలోని చిగురుకోట వద్ద శిబిరం వేసి, ఒక కాలువను తవ్వి (నేటి ఉప్పటేరు) సరస్సును సముద్రంలోకి మళ్లించారు.

ఆ సమయంలో గజపతి రాజు సైన్యాధ్యక్షుడు యుద్ధంలో విజయం సాధించాలని తన కూతురు పేరంటాలమ్మను బలి ఇవ్వబోయాడు. అప్పుడే ఆమె శక్తి స్వరూపిణిగా మారి, మహిషాసురమర్దినిగా శత్రువులను సంహరించింది.

ఈ సంఘటన అనంతరం, క్రీ.శ. 1237–1282 మధ్యకాలంలో పేరంటాలమ్మ ఆలయం నిర్మించబడింది. కాలక్రమేణా ఆమెనే పెద్దింట్లమ్మగా పూజిస్తున్నారు.

పెద్దింట్లమ్మ జాతర – 2026 తేదీలు

ఫిబ్రవరి 18 నుంచి మార్చి 03 వరకు – జాతర మహోత్సవాలు
ఫిబ్రవరి 28 – శ్రీ జలదుర్గ గోకర్ణేశ్వర స్వామివార్ల కళ్యాణం
మార్చి 02 – తెప్పోత్సవం

ఎలా చేరుకోవాలి ?

కొల్లేటికోట పెద్దింట్లమ్మ ఆలయానికి చేరుకునే మార్గాలు

ఆకివీడు నుంచి:
ఆకివీడు పట్టణం నుంచి లాంచీల ద్వారా కొల్లేరు సరస్సు మీదుగా నేరుగా కొల్లేటికోటకు చేరుకోవచ్చు. భక్తులకు ఇది సులభమైన మార్గం.

బస్సు మార్గం ద్వారా:

ఏలూరు నుంచి (సుమారు 40 కిలోమీటర్లు)
కైకలూరు నుంచి (సుమారు 20 కిలోమీటర్లు)
ఈ ప్రాంతాల నుంచి కొల్లేటికోటకు ఆర్టీసీ బస్సులు మరియు ప్రైవేట్ బస్సులు అందుబాటులో ఉన్నాయి.

రైలు మార్గం ద్వారా:
సమీప రైల్వే స్టేషన్ ఆకివీడు రైల్వే స్టేషన్. అక్కడి నుంచి లాంచీ లేదా రోడ్డు మార్గంలో కొల్లేటికోటకు చేరుకోవచ్చు.

స్వంత వాహనంలో:
ఏలూరు / కైకలూరు → ఆకివీడు → కొల్లేటికోట
రోడ్డు మార్గం ద్వారా ఆకివీడు వరకు వెళ్లి, అక్కడి నుంచి లాంచీల ద్వారా ఆలయానికి చేరుకోవచ్చు.