Kondameeda Rayudu Temple: కొండమీద రాయుడు బ్రహ్మోత్సవాలు 2026 – రథోత్సవం, అఖండ దీప దర్శనం వివరాలు

ఆంధ్రప్రదేశ్ రాష్ట్రం అనంతపురం నగరానికి సుమారు 5 కిలోమీటర్ల దూరంలో, బుక్కరాయసముద్రం మండల కేంద్రంలోని సిద్దరాంపురం రోడ్డు సమీపాన ఉన్న దేవరకొండపై శ్రీలక్ష్మీ సహిత వేంకటేశ్వర స్వామి విరాజిల్లుతున్నారు. ఈ స్వామివారిని భక్తులు ప్రేమగా కొండమీద రాయడు అని పిలుస్తారు.

ఆలయ స్థల విశేషాలు

బుక్కరాయసముద్రం గ్రామానికి దక్షిణ దిశగా ఒక కిలోమీటరు దూరంలో దేవరకొండ ఉంది.
ఈ కొండ శిఖరాగ్రాన శ్రీ వేంకటరమణుడు శ్రీలక్ష్మీ దేవితో కలిసి సతీసమేతంగా కొలువుదీరారు.
కొండపైన సహజసిద్ధంగా ఏర్పడిన రెండు భారీ బండరాళ్ల మధ్య గుహలాంటి ప్రదేశంలో స్వామివారి శిలావిగ్రహం దర్శనమిస్తుంది.

పౌరాణిక – చారిత్రక ప్రాధాన్యం

పూర్వకాలంలో గార్గూయ మహర్షి దేవరకొండపై కఠోర తపస్సు చేసినట్లు పురాణాలు చెబుతున్నాయి. మహర్షి తపస్సుకు మెచ్చిన శ్రీ వేంకటేశ్వరుడు ఈ కొండపై ప్రత్యక్షమైనట్లు భక్తుల విశ్వాసం.

మహర్షి స్వయంగా గుహలో శ్రీ వేంకటేశ్వరుడి శిలావిగ్రహాన్ని ప్రతిష్ఠించి పూజలు నిర్వహించినట్లు చరిత్ర చెబుతోంది.
విజయనగర సామ్రాజ్య కాలంలో ఈ ఆలయం విశేషంగా అభివృద్ధి చెందింది.
విజయనగర రాజులే ఇక్కడ బ్రహ్మోత్సవాలను ప్రారంభించినట్లు చారిత్రక ఆధారాలు సూచిస్తున్నాయి.

మాఘమాసంలో నిర్వహించే బ్రహ్మోత్సవాల సందర్భంగా కొండమీద రాయడిని దర్శించుకుంటే వైకుంఠ ప్రాప్తి లభిస్తుందని భక్తులు అచంచల విశ్వాసంతో చెబుతారు.